ہمارے بارے میں

اُردو رائٹر ویب سائیٹ راؤ محمد شاہد اقبال کی ایسی طبع زاد تحریروں کا ڈیجیٹل مجموعہ ہے۔جنہیں راؤ محمد شاہد اقبال نے اپنی زندگی کے مختلف تخلیقی ادوار میں اخبارات، رسائل و جرائد کے لیئے صفحہ قرطاس پر منتقل کیا۔چونکہ اُردو اَدب میں کسی ادیب،مصنف،تخلیق کار یا محقق کی تصنیف کی گئیں تخلیقات کے ایک جگہ جمع کیئے گئے مخطوطے یا مجموعہ کو اَدبی اصطلاح میں کلیات کہا جاتا ہے۔اِس مناسبت سے آپ اُردو رائٹر کی اِس ویب سائیٹ کو دنیائے انٹرنیٹ پر منصہ شہود پر آنے والی پہلی باقاعدہ ڈیجیٹل کلیات بھی کہہ سکتے ہیں۔جس میں راؤ محمد شاہد اقبال کی فقط اُن ہی تحریروں کو شائع کرنے کا اہتمام کیا گیا ہے، جو اُردو زبان کے مختلف اخبارات،رسائل و جرائد میں طبع ہو کر اپنے قارئین سے پسندیدگی کی سند حاصل کر چکی ہیں۔یاد رہے کہ راؤ محمد شاہد اقبال کی جس شائع شدہ تحریر کو بھی اُردو رائٹر کی اِس ویب سائیٹ پر پیش کرنے کا اہتمام کیا گیا ہے۔اُس تحریر کے عین اختتام پر حوالہ کے تحت یہ تفصیل بھی درج کردی گئی ہے کہ مذکورہ تحریر اُردو زبان کے کس اخبار،رسالہ یا جریدے میں کس تاریخ کو سب سے پہلے زیورِ طباعت سے آراستہ ہوئی۔جبکہ ہر تحریر کے ساتھ وہ لنک بھی فراہم کردیا گیا ہے جس پر کلک کر کے آپ تحریر کی اشاعت کا اصل طبع شدہ مسودہ بھی ملاحظہ کرسکتے ہیں۔
راؤ محمد شاہد اقبال کی شائع شدہ تحاریر اُردو رائٹر کی ویب سائیٹ پر پیش کرنے کے دو بڑے مقاصد ہیں۔پہلا مقصد تو مصنف کے مختلف اخبارات، رسائل و جرائد میں بکھرے ہوئے تحریری مواد کو ایک جگہ ترتیب و تدوین کے مراحل سے گزار کر خوب صورت ڈیجیٹل انداز میں جمع کرنا ہے تاکہ بوقتِ ضرورت کسی مخصوص تحریر کی تلاش میں ممکنہ طور پر پیش آنے والی غیر ضروری کوفت اور وقت کے ضیاع سے بچا جا سکے۔جبکہ دوسرا اور سب سے اہم ترین مقصد انٹرنیٹ پر موجود لاکھوں اُردو دوست احباب تک ایک ایسا صاف ستھرا تحریری مواد پہنچانا ہے،جو اُردو زبان کے مختلف اخبارات،رسائل اور جرائد کی ادارت کرنے والے انتہائی کہنہ مشق مدیروں کی گہری نظروں سے ہوکر گزرا ہو۔ تاکہ انٹرنیٹ پر اُردو زبان کے نام پر پیش کی جانے والی عامیانہ زبان، ذو معنی اخلاق باختہ جملے اورزیر زبر پیش کی اغلاط سے بھرپور تحاریر کے مقابل اُردو زبان کی درست تحریریں پیش کی جاسکیں۔اُردو رائٹر کا بنیادی مقصدوحید اُردو زبان و بیان کے مثبت رویوں کو تحریک اور فروغ دینا ہے۔اِس کے لیئے ضروری ہے کہ انٹرنیٹ پر بھی صرف وہی تحریریں پیش کی جائیں جو ایک طویل ادارتی عمل سے ہوکر گزری ہوں۔
”اُردو رائٹر“ کے خالق راؤ محمد شاہد اقبال ہیں،جنہوں نے انتہائی محنت اور جدت سے اِس ویب سائیٹ کو بنانے کی کوشش کی ہے۔اِس نسبت سے آپ انہیں اُردو رائٹر کا مدیر اعلیٰ بھی کہہ سکتے ہیں۔راؤ محمد شاہد اقبال ایک طویل عرصہ سے تحریر و تصنیف سے وابستہ ہیں۔اِن کی پہلی تحریر بچوں کے معروف جریدہ ماہنامہ نونہال میں اُس وقت شائع ہوئی تھی جب وہ پانچویں کلاس میں زیرِ تعلیم تھے۔ماہنامہ نونہال کے مدیراعلیٰ اور ہمدرد پاکستان کے روحِ رواں مرحوم و مغفور جناب حکیم محمد شہید صاحب کی خصوصی حوصلہ افزائی اور دستِ شفقت نے راؤ محمد شاہد اقبال کے تخلیقی سفر کو ابتداء میں ہی وہ جلا بخش دی تھی کہ آج بھی اُن کا تحریر و تصنیف کا سفر بدستور جاری و ساری ہے۔پاکستان کے موقر اُردو اخبارات، جرائد اور رسائل میں آئے روز بلاکسی توقف کے اُن کی تحاریر کالمز، مضامین اور خصوصی رپورٹس کی صورت میں شائع ہورہی ہیں۔جنہیں اَب آپ اُردو رائٹر کی ویب سائیٹ پر بھی ڈیجیٹل انداز میں ملاحظہ کرسکیں گے۔ اگر آپ اُردورائٹر کی ویب سائیٹ پر کسی خامی کو دیکھیں تو ہمیں ضرور اطلاع دیں۔ ہم پوری کوشش کریں گے کہ اس خامی کو دور کیا جا سکے۔ا سکے علاوہ آپ کی قیمتی رائے اور تجاویز اُردو رائٹر کی ویب سائیٹ کو بہتر سے بہترین بنانے میں اپنا اہم کردار ادا کر تی رہیں گی۔اس لیئے ادارہ اُردو رائٹر اپنے تمام قارئین کو اِس بات کی دعوت دیتاہے کہ وہ خود بھی اِس ویب سائیٹ پر شائع ہونے والے ہر مضمون پر اپنی رائے کا کھل کر اظہار کریں اور اپنے دوستوں کو اِس عملِ سعید پر آمادہ کریں تاکہ اُردو رائٹر کی ویب سائیٹ پر مثبت مکالمے کی فضا قائم ہوسکے۔ جس کے لیئے ضروری ہے کہ آپ ہر تحریر کے آخر میں موجود تبصرے کی سہولت کا بھرپور استعمال کریں۔بہترین،معقول اور مدلل انداز میں تحریر وں پر رائے اور تبصرے کرنے والوں کے خیالات نہ صرف نمایاں طور پر جگہ دی جائے بلکہ اِن کی حوصلہ افزائی کے لیئے انہیں خصوصی تحائف سے بھی نواز اجائے گا۔اِس اقدام کا مقصد اُردو رائٹر کی ویب سائیٹ پر آنے والے زیادہ سے زیادہ قارئین کو اپنی ویب سائیٹ کا ایک باقاعدہ قاری اور حصہ بنانا ہے۔ہمیں اپنی آراء اور تجاویز سے ضرور آگاہ کیجئے گا۔